Zyrtarët doganorë në Pikëkalimin Kufitar të Vermicës kanë selektuar për kontroll një furgon, i cili pas vlerësimit fillestar është dërguar në vijën e dytë për kontroll të detajuar, në bashkëpunim me Policinë Kufitare.

Gjatë intervistimit, drejtuesi i automjetit ka deklaruar se nuk kishte mallra për deklarim, shkruan Arbresh.info.

Kontrolli fizik ka zbuluar të kundërtën: në bagazhin e furgonit janë gjetur mallra të padeklaruara dhe të ndaluara, konkretisht eksplozivë, të paketuar në thasë dhe pako me peshë të përafërt rreth 300 kilogramësh.

Sipas Doganës, materiali ishte i fshehur dhe i kamufluar me pajisje peshkimi.

Malli i rrezikshëm është sekuestruar, ndërsa ndaj personit të dyshuar është iniciuar procedurë kundërvajtëse sipas Kodit Doganor dhe të Akcizave të Kosovës. Rasti është dorëzuar te Policia Kufitare, e cila po vazhdon me veprimet e mëtejshme ligjore./Arbresh.info