Ministrja e Arsimit, Arbërie Nagavci ka pritur në takim ambasadorin e Suedisë në Kosovë, Jonas Westerlund me bashkëpunëtorë të shoqëruar nga fituesit e garës Superhero, Ana Krasniqi dhe Edvin Susuri.

Në këtë takim është diskutuar për mundësinë e bashkëpunimit në këtë fushë të çështjes klimatike, përcjell Arbresh.info.

“Prita sot në një takim ambasadorin e Suedisë në Kosovë, Jonas Ëesterlund, me bashkëpunëtorë të shoqëruar nga fituesit e garës Superhero, Ana Krasniqi dhe Edvin Susuri. Kjo garë është zhvilluar pas thirrjes së hapur për përzgjedhjen e një Superheroi për çështje klimatike, ndërsa fituesit e garës janë përzgjedhur nga një juri profesionale me ndihmën e Anibar dhe Dokufest.”, ka shkruar Nagavci.

“Diskutuam për mundësinë e bashkëpunimit në këtë fushë, në mënyrë që së bashku të kontribuojnë për vetëdijësimin e fëmijëve për çështjet klimatike.”, tha ajo.

Tutje ajo ka uruar fituesit dhe ka shprehur gatishmëri për të kontribuar në inciativën për edukimin e fëmijëvë jo vetëm në Kosovë, por në mbarë botën.

Ministrja Nagavci bëri të ditur se Ambasada e Suedisë do të ofrojë mbështetje për krijimin e një gazete me ilustrime me superheronj që mbrojnë ambientin e cila do të shpërndahet tek nxënësit e ciklit 1-5, në kuadër të fushatës për mbrojtjen e ambientit./Arbresh.info