Ministri i Punëve të Brendshme, Flamur Sefaj ka thënë se për shkak të situatës emergjente që po përballet Shqipëria për shkak të reshjeve të shiut ka miratuar nisjen e ekipeve për shpëtim në ujëra sipërfaqësor nga Agjencia e Menaxhimit Emergjent të Kosovës.

Ai në një status në rrjetin social facebook ka shkruar se ekipet janë të përbëra prej 34 pjesëtarëve të përzgjedhur nga Njësitë Profesionale të Zjarrfikjes dhe Shpëtimit.

Statusi i plotë:

Republika Shqipërisë po ballafaqohet me një situatë emergjente për shkak të shirave të pandërprerë dhe sipas parashikimeve të tyre situata sa vjen e përkeqësohet. Si rezultat i kësaj në koordinim me Drejtorin e Përgjithshëm të AME-së kam miratuar nisjen e ekipeve për shpëtim në ujëra sipërfaqësor nga Agjencia e Menaxhimit Emergjent të Kosovës.

Ekipet janë të përbëra prej 34 pjesëtarëve të përzgjedhur nga Njësitë Profesionale të Zjarrfikjes dhe Shpëtimit, të pajisur me mjetet përkatëse për zhvillimin e operacioneve të shpëtimit në ujëra sipërfaqësor dhe kjo natyrisht pa e dëmtuar kapacitetin tonë reagues brenda vendit.