Projektligji për buxhetin e Republikës së Kosovës për vitin 2019 nuk ka arritur të marrë mbështetjen e të gjithë përfaqësuesve të legjislativit as në leximin e parë.

Përkundër kritikave të shumta, dhe rrezikut për mos miratimin e tij brenda këtij muaji, nga partitë e pozitës nuk po shihet si rrezik për të çuar vendin në zgjedhje.

Deputeti i Partisë Demokratike të Kosovës, Zenun Pajaziti, thotë për arbresh.info se pavarësisht kundërshtimeve të opozitës, çështja e buxhetit nuk mund të qojë vendin në zgjedhje të reja.

“Janë procedurat ligjore për miratimin e buxhetit. Puna e zgjedhjeve është punë votash në kuvend ai që ka votat e mjaftueshme ta kërkoj një gjë të tillë në kuvend mundet me buxhet e pa buxhet të shkojë deri të zgjedhjet e reja”, shprehet Pajaziti.

Por, për Lëvizjen Vetëvendosje, shkuarja në zgjedhje është çështje urgjente.

“Vendi duhet te shkoje sa me pare ne zgjedhje, për shume arsye, por kryesorja për ta ndalur trendin e gabuar në raport me Serbinë, trend i cili po e shkatërron të ardhmen e Kosovës”, ka deklaruar deputeti i kësaj partie, Rexhep Selimi, për arbresh.info.

NISMA Socialdemokrate vlerëson se Kosova nuk e ka komoditetin të shkojë në zgjedhje, dhe se partitë duhet të ulen të bisedojnë orientimin e buxhetit.

“Vendi nuk shkon në zgjedhje tashmë që kanë filluar ftesat e para për Gjykatën Speciale dhe Kosova nuk e ka luksin për të shkuar në zgjedhje deri vjeshtën e vitit të ardhshëm. Por, është ma mirë për partitë politike me u ul dhe të bisedojnë se ku ta orientojmë buxhetin”, vlerëson Zeka.

Partitë opozitare kanë kritikuar buxhetin e vitit 2019 duke e cilësuar si elektoral dhe jo zhvillimor dhe rrjedhimisht kërkojnë zgjedhje të reja nacionale./Ardita Zeka/arbresh.info/