Kryeparlamentari Kadri Veseli ka pritur në takim mjekët specialistë të cilët kanë protestuar sot para Kuvendit të Kosovës, për mos anulimin e konkursit për 220 vende pune nga Inspektorati i Punës.

Ai ka kërkuar informacione shtesë nga ky grup i protestuesve specialistë lidhur me anulimin e konkursit, raporton Ekonomia Online.

“Është vështirë t’i shohësh mjekët në rrugë. Në besë të shqiptarit, as nuk po e di, as nuk kam pasur informacion që mjekët të cilët kanë përfunduar shkollën e nuk janë të punësuar”, është shprehur Veseli.

Kurse përfaqësuesi i protestuesve Arben Ademi i ka thënë kryeparlamentarit si ai është i vetmi që ka pranuar shqetësimet e tyre.

Ai ka treguar edhe procedurat e konkursit duke thënë se Inspektorati i Punës dëshiron të anulojë konkursin. Sipas tij, me këtë konkurs arrijnë të punësohen 220 specialistë.