Numri i personave që kanë vizituar Republikën e Kosovës gjatë muajit qershore, ka shënuar rritje.

Kështu ka bërë të ditur ministria e Industrisë, Ndërmarrësisë dhe Tregtisë përmes një njoftimi në Facebook, përcjell Arbresh.info.

Siç thuhet në njoftim, 60.98 për qind e vizitorëve ishin të jashtëm.

“Numri i përgjithshëm i vizitorëve në Republikën e Kosovës gjatë muajit qershor të këtij viti ka pasur rritje prej 29%, krahasuar me qershorin e vitit të kaluar. Vlen të theksohet se nga numri i përgjithshëm i vizitorëve 60.98% ishin të jashtëm kurse 39.02 % ishin vendorë”, thuhet në njoftim.

Vizitorët e huaj më shumë vinin nga Shqipëria, Gjermania, Turqia dhe Zvicra.

“Sipas Agjencisë së Statistikave të Kosovës, statistikat e Hotelerisë për muajin qershor 2023 rezultojnë me 13.3 % rritje të vizitorëve të jashtëm, krahasuar me qershorin e vitit 2022. Në total 29 317 vizitorë të huaj, nga të cilët numri më i madh është nga: Shqipëria, Gjermania, Turqia, Zvicra etj”, thuhet tutje në njoftim.

“Vizitat janë evidentuar nga qëndrimet në hotelet e Republikës së Kosovës, kurse vizitat ditore nuk hyjnë në këtë evidencë e që nëse llogariten përqindja do të ishte shumë më e lartë. Kosova, gjithnjë e më atraktive për turistët!”, përfundon njoftimi./Arbresh.info

Për të parë atraksionet turistike në Republikën e Kosovës kliko KËTU