Instituti i Kosovës për Drejtësi  ne bashkëpunim me Rrjetin e Grave te Kosovës, ka thënë se vrasja e Sebahate  Sopit ka ndodhur për shkak të mos veprimit të institucioneve të shtetit, përkatësisht prokurorisë.

Në konferencën për medie ku u publikua raporti  “Shteti me mos veprim, privon nga jeta Sebahate Sopin”, tha se Prokuroria  po mundohet të mbulojnë këtë rast.

Ehat Miftaraj nga IKD-ja tha se Sebahate Sopi është viktimë e shtetit të Kosovës.

“Republika e Kosovës edhe njëherë dështoi në mbrojtjen e Sebahate Sopa, në bazë të ekspertizës është viktimë e shtetit të Kosovës. Pozita e prokurorit nuk është privilegj, por është përgjegjësi para Kushtetutës dhe qytetarëve të Republikës së Kosovës”, tha ai.

Adelina Berisha- nga rrjeti i grave të Kosovës tha që mbrojta e grave dhe këtyre viktimave duhet të bëhet nga ata që duhet, respektivisht institucioneve.

“Do donim që mbrojtja  e grave të bëhet nga ata që duhet të na mbrojnë, dhe tashmë nuk është habi për këto raste ku gratë raportojnë për dhunën e tyre në familje”, tha Berisha.

Ajo theksoi që shpreson shume që kjo të jetë vrasja dhe dhuna e fundit që po u bëhet grave.

“Le të shpresojmë qe ky të jetë rasti i fundit që na ka bërë bashke këtu, dhe të mos tolerohet vrasja dhe dhuna e grave”, përfundoi ajo.

Gëzim Shala nga IKD-ja  tha se vrasjen Sopa i ka paraprirë dështimi i institucioneve.

“Vrasjes së të ndjerës Sopi i ka paraprirë dështimi i Institucioneve, dhe tashmë edhe vet institucionet dhe prokuroria që po mundohen ta mbulojnë këtë rast, bazuar në komunikatën e Prokurorisë në fjalë. Bëhet fjalë për një dhunë sistematike, dhe përkundër kësaj prokuroria nuk ka marrë as edhe një hap kundrejt kësaj dhe të parandalohet një vrasje”, theksoi tutje ai.