Mbrojtja e drejtort të Korporatës Energjetike të Kosovës (KEK), Nagip Krasniqit, ka ushtruar ankesë në Gjykatën e Apelit, kundër vendimit të Gjykatës Themelore në Prishtinë, e cila ia ka caktuar masën e paraburgimit në kohëzgjatje prej 30 ditësh.

Lajmin për Arbresh.info e ka bërë të ditur mbrojtësi i Krasniqit, avokati Taulant Ferizi.

“Po, kemi ushtru ankesë në Apel ndaj aktvendimit të Themelores për caktimin e masës së paraburgimit”, ka thënë Ferizi.

Ndryshe, Krasniqi është arrestuar më 19 prill, pas bastisjeve që janë kryer nga njësia e Veçantë e Hetimeve, në zyrën e tij në KEK dhe dy banesat e tij dhe i njëjti u dërgua në mbajtje.

Ndërsa, më 20 prill, Prokuroria Speciale e Republikës së Kosovës (PSRK), paraqiti kërkesë në Themelore, lidhur me caktimin e masës së paraburgimit ndaj Krasniqit. Pas mbajtjes së seancës dëgjimore, Gjykata Themelore në Prishtinë, ia caktoi drejtorit të KEK-ut një muaj paraburgim.

Nagip Krasniqi dyshohet se ka kryer veprat penale “Keqpërdorim i detyrës zyrtare”, “Ushtrim ndikimi” dhe “Konflikt interesi”.