Ka përfunduar sot afati shtesë për regjistrimin e objekteve pa leje. Gjatë këtij afati mbi 332 mijë kërkesa për legalizim janë paraqitur në tërë territorin e Kosovës.

Kështu deklaroi sot, drejtori i Departamentit për Planifikim Hapësinor, Ndërtimit dhe Banimit, Blerim Çeku , i cili e quajti si një proces shumë të suksesshëm duke thënë se janë regjistruar shumica absolute e objekteve pa leje.

Edhe pse në pjesëmarrjen e këtij regjistrimi qasja e qytetarëve ka qenë e kënaqshme, sipas Çekut, ka pasur disa mangësi të ndjeshme sidomos në komunat veriore. Mirëpo, më e rëndësishmja sipas tij është se edhe në komunat e banuar me serb ka pasur aplikime për regjistrimin e objekteve pa leje.

“Të gjitha objektet që janë regjistruar deri më sot, qytetarët që i kanë lajmëruar kanë ndihmuar shumë në këtë proces dhe vlen të përshëndetet dhe të respektohet kjo qasje e qytetarëve në krejt territorin e Kosovës, ndoshta me mangë si të ndjeshme në komunat veriore, edhe në komunat tjera në kuadër të Kosovës. Ju njoftoj se edhe në pjesë e Mitrovicës Veriore kanë qenë të regjistruar mbi 650 ndërtime pa leje, gjithashtu edhe në pjesët e tjera ku qytetarët e komuniteti serb jetojnë ka të regjistruara”, tha Çeku.

Sipas tij, në të gjitha komunat serbe paraqitja e objekteve pa leje kalon numrin 5 mijë.

Ndërsa afatin shtesë të legalizimit, Çeku e justifikoi duke thënë se ka qenë shumë i nevojshëm, pasi që e ka mbi dyfishuar numrin e aplikimeve për objekte pa leje që kanë qenë deri me 5 shkurt.

“Justifikimi i bazuar për këtë shmangie nga afati i rregullt 5 shkurt 2015 është vet fakti se numri i ndërtimeve që janë shtuar prej shkurtit deri në ditën e sotme është mbi dyfish. Diku në shkurt kanë qenë rreth 160 mij ë objekte të ndërtuara të regjistruar në regjistër kombëtarë, ndërsa të dhënat e fundit nga dita e djeshme e 10 qershorit që i kam marrë nga regjistri kombëtarë janë mbi 332 mijë objekte që janë regjistruar, përkatësisht ndërtime në tërë territorin e Kosovës”, tha Çeku.