Kolegji i Shkencave të Aplikuara Teknike “Tempulli” dhe Asociacioni Kosovar i Motorizimit “AMRKS” në bashkëpunim me Ministrinë e Arsimit, Shkencës dhe Teknologjisë dhe përkrahjen nga Këshilli për siguri në trafikun rrugor, Policia e Kosovës, Komuna e Prishtinës, Forumi i Kosovës për Siguri në Rrugë, për herë të pestë organizon garat tradicionale të nxënësve me biçikleta lidhur me njohuritë për trafikun.

Gjatë këtij aktiviteti nxënësit e shkollave fillore dhe të mesme të ulëta do të tregojnë shkathtësitë e tyre në ngasjen e biçikletës.

Njëkohësisht, përmes mbështetjes dhe aktiviteteve për kampanjën SaveLives #SlowDown do të kërkojnë më shumë siguri në rrugë dhe respektim të plotë të shenjave dhe rregullave të trafikut.

Garat e nxënësve me biçikleta dhe aktivitetet për kampanjën SaveLives #SlowDown do të mbahen në Sheshin “Zahir Pajaziti” në Prishtinë.

Zhvillimi i aktiviteteve dhe plani i veprimit të përbashkët në rritjen e sigurisë në rrugë, janë kërkesë edhe e planit global për Dekadën e veprimit 2011-2020 të Organizatës së Kombeve të Bashkuara, andaj i ftojmë të gjithë qytetarët që të bashkohen për të kërkuar më shumë siguri në rrugë.