Ministri i Mbrojtjes, Ejup Maqedonci, priti sot në takim Shefen e Operacioneve Aktuale në Divizionin për Operacione të Shtabit të Përgjithshëm të NATO-s, Ariella Viehe.

Gjatë takimit, Maqedonci e informoi Viehe mbi zhvillimet aktuale në Ministrinë e Mbrojtjes dhe Forcën e Sigurisë së Kosovës, si dhe mbi planet strategjike për të ardhmen, shkruan Arbresh.info.

Ai theksoi përkushtimin e vazhdueshëm për koordinim dhe bashkëpunim të ngushtë me KFOR-in dhe Ekipin Këshillues dhe Ndërlidhës të NATO-s (NALT), duke ritheksuar se objektivi kryesor mbetet anëtarësimi në NATO.

Ky synim do të mundësojë që FSK-ja të kontribuojë më fuqishëm në ruajtjen e stabilitetit dhe paqes në rajon dhe më gjerë.

“Ministria e Mbrojtjes mbetet e përkushtuar në avancimin e kapaciteteve të saj dhe forcimin e partneritetit me NATO-n, me qëllim të sigurimit të një mjedisi të qëndrueshëm dhe paqësor për të gjithë qytetarët e Republikës së Kosovës.”, thuhet në njoftim./Arbresh.info/