Përfaqësuesi i Asamblistëve të LDK-së në Kuvendin Komunal të Prishtinës, Agim Gashi, në një konferencë për media ka kritikuar gjendjen e shkollave në Komunën e Prishtinës.

Ai ka thënë se gjendja e këtyre shkollave nuk përputhet me fjalët e kryetarit të Prishtinës, Shpend Ahmetit, i cili, sipas tij, kishte deklaruar që të gjitha shkollat janë të gatshme për ta filluar procesin mësimor të rregullt, raporton portali arbresh.info.

“Sot në radhë është fusha e arsimit që ta diskutojmë, ku pas deklaratës së kryetarit të Prishtinës, i cili tha që të gjitha shkollat e Prishtinës janë të gatshme për të filluar vitin shkollor, ne mendojmë që kjo deklaratë e kryetarit të Prishtinës nuk përputhet fare me realitetin”.

“Ne po i identifikojmë disa çështje që i vlerësojmë që nuk janë bërë punë të kryera ashtu siç duhet”.

Ndërkaq Gashi ka paraqitur disa shembuj që sipas tij, shkollat nuk po qeverisen në mënyrë e duhur.

“Ka shembuj në shkolla ku drejtori mbahet si ushtrues detyre. Nëse këto kuadro nuk e meritojnë të mbajnë këto pozita, atëherë duhet ta lirojnë atë vend. Asnjë sqarim nuk është dhënë, së paku konkurrentëve dhe nuk përfundon me vite përzgjedhja e drejtorëve, ku shembull eklatant është tema ku që disa vite është drejtoresha e njëjtë. Unë e kuptoj zonën e Veternikut ku shkollat nuk mund t’i plotësojnë nevojën, por s’e kuptoj regjistrimin prej Fushë Kosovës në Prishtinë ose prej Vranjefvcit në ‘Faik Konicë’, sepse këto e mundësojnë një disbalanc në regjistrimin e fëmijëve”, tha ai. ./arbresh.info/