Kosova ka disa javë që po përballet me mot të paqëndrueshëm. Mund të themi se brenda ditës përjetojmë gati të katër stinët.

Shi, diell, breshër, tepmeratura të larta e erëra të fuqishme- është ky moti me të cilin po përballemi tash e disa javë.

Të paktën, reshjet e shiut do të ndihmojnë që të rritet niveli i ujit në liqenet akumuluese të Kosovës. Kështu bën të ditur profesori i metrologjisë në Universitetin e Prishtinës, Sylë Tahirsylaj.

Tahirsylaj në një përgjigje për Periskopin thotë se në vendin tonë temperatura minimale do të jetë 8-10 gradë, ndërsa maksimalja 23-26 gradë Celcius.

‘Vendi ynë do të vazhdoj të jetë nën ndikimin e erërave me shpejtësi deri në 8 metra për sekond në drejtim të verilindjes jugut dhe jugperëndimit. Këto masa kanë veti të ndryshme fizike dhe me shkallë të lartë të lagështisë, për pasojë moti do të jetë i ndryshueshëm me intervale kohore me diell dhe me vranësira të cilat do të përcjellen me reshje shiu dhe me mundësi të breshërit. Temperaturat minimale do të luhaten nga 8-10 gradë Celsius dhe deri tek më të lartat 23-26 gradë celcius. Prapë është një mot pothuajse i pranverës dhe sasia e reshjeve do të ketë efekt pozitiv për plotësimin e kushteve të lagështisë së tokës dhe për ngritjen e nivelit të ujërave në liqetë akumuluese të Kosovës. Kjo gjendje do të jetë e qëndrueshme deri në fund të javës. Intensiteti i reshjeve do të jetë i ndryshueshëm. Lëkundët në vlerat mesatare të reshjeve dhe është një mot tipik pranveror’’, përfundon Tahirsylaj.

Edhe nga Instituti Hidrometeorologjik i Kosovës është konfirmuar se gjatë pesë ditëve të ardhshme do të ketë mot të paqëndrueshëm.

Reshjet e shiut të përcjella me shkarkime rrufesh, parashihen të jenë lokale dhe afatshkurta, por prezent në të gjitha ditët e kësaj jave.

Temperaturat minimale parashihen të lëvizin ndërmjet 10-13 gradë Celsius, ndërsa maksimalet e ditës parashihen të lëvizin ndërmjet 22-27 gradë Celsius.

Do të fryjë erë nga jugperëndimi me shpejtësi 1-10 m/s.