Serbët që po protestojnë do të zhbllokojnë rrugën në Jarinjë, vetëm kur të lejohen të shkojnë deri në pikën kufitare Kosovë-Serbi.

Kështu ka bërë të ditur Igor Simiq nga Lista Serbe, duke shtuar se “nëse nuk do të lejohen do të flenë në rrugë”.

“Qytetarët duhet të qëndrojnë të qetë mos me ra pre e provokimeve që s’po dihet kush i ka nxit. Dikush që ka qëllim që të shkaktojë  trazira në veri”, deklaroi Simiq duke nënkuptuar marrjen e vendimit për targat.

Ai ka përmendur takimin e presidentit të Serbisë, Alekasandar Vuçiq dhe emisarit të BE-së, Miroslav Lajçak.

“Me gjasë ka përfunduar takimi i Vuçiqit me Lajçakun. Është biseduar aty edhe për këto tensione. Ju po e shihni njerëzit janë të frikësuar. Kemi drejt për protestë paqësore, por po ashtu njerëzit kanë të drejtë për lëvizje të lirë”, deklaroi Simiq para medieve.

Ministri i Punëve të Brendshme, Xhelal Sveçla, ka nxjerrë vendimin përmes të cilit obligohet pajisja me targa të përkohshme për të gjitha automjetet që mbajnë targa të Serbisë dhe hyjnë në territorin e Republikës së Kosovës.

Vendimi që hynë në fuqi nga sot, parasheh po ashtu që pajisja me targat e përkohshme bëhet në të gjitha pikat e kalimit kufitar të Republikës së Kosovës./arbresh.info/