Gjykata Kushtetuese e Kosovës ka vendosur masë të përkohshme, përmes së cilës ndalon deputetët të ndërmarrin veprime dhe pezullon çdo procedurë për formimin e Qeverisë së Kosovës.

Ky vendim u mor në bazë të kërkesës së dorëzuar nga 10 deputetë të Kuvendit, me përfaqësues Igor Simiq, të cilët kërkuan vlerësimin e kushtetutshmërisë së procesverbaleve të seancave të Kuvendit të mbajtura më 26 dhe 28 gusht 2025, si dhe vendimeve të nxjerra në këto seanca.

Gjykata Kushtetuese, e përbërë nga kryetari Nexhmi Rexhepi dhe anëtarët Safet Hoxha, Bajram Ljatifi, Radomir Laban, Remzije Istefi-Peci, Enver Peci dhe Jeton Bytyqi, vendosi të caktojë masën e përkohshme që ndalon çdo veprim të deputetëve dhe çdo procedurë për formimin e Qeverisë.

“Masa hyn në fuqi më 5 shtator 2025 dhe zgjat deri më 30 shtator 2025. Vendimi do të publikohet në Gazetën Zyrtare dhe do t’u kumtohet palëve”, thuhet në vendimin e Gjykatës Kushtetuese.

VENDOS

I. TË CAKTOJË ex officio dhe sipas kërkesës së parashtruesve masën e përkohshme përmes të cilës ndalohet çdo veprim i deputetëve të zgjedhur të Kuvendit të Republikës së Kosovës, si dhe çdo procedurë për formimin e Qeverisë;

II. TË URDHËROJË që masa e përkohshme hyn në fuqi më 5 shtator 2025, në kohëzgjatje deri më 30 shtator 2025;

III. T’U’A KUMTOJË këtë Vendim palëve;

IV. TË PUBLIKOJË këtë Vendim në Gazetën Zyrtare, në pajtim me paragrafin 4 të nenit 20 të Ligjit;

V. Ky Vendim hyn në fuqi më 5 shtator 2025./Arbresh.info