Në përvjetorin e 41-të të demonstratave të pranverës së vitit 1981, Kryeministri i Republikës së Kosovës, Albin Kurti, bashkë me deputetë të Kuvendit të Republikës së Kosovës, vizitoi veprimtarin dhe ish-deputetin, Ali Lajçi.

Së bashku me kryekuvendarin Glauk Konjufca dhe deputetë e deputete të Kuvendit të Republikës së Kosovës, kryeministri priti në takim veprimtarë e veprimtare, ish të burgosur, bashkë organizatorë të demonstratës së 11 marsit të vitit 1981, shkruan arbresh.info.

Demonstratat e 1981 shënuan fillimin e një procesi të pandërprerë, që çoi deri në zhbërjen e Jugosllavisë dhe çlirimin e Kosovës, tha kryeministri Kurti. Ai theksoi se në mars 1981 populli demonstroi se është i gatshëm të vetëvendos e të vetëqeveriset, ndërsa lëvizjet dhe organizimet e pandërprera për Republikën e Kosovës morën vrull e energji të re.

Gjatë takimit u rikujtua bashkë organizimi i demonstratës masive, si përgjigje kundër dhunës që u përdor për të shtypur protestat e studentëve. U kujtua mobilizimi i madh popullor dhe mbështetja edhe nga punëtorët, për demonstratën e organizuar më 11 mars 1981 nga studentët e nxënësit e shkollave të mesme.

Këto demonstrata u vlerësuan si hapi i madh në rrugën e gjatë e plot krenari, që solli rrëzimin e ish-Jugosllavisë dhe çlirimin e Kosovës, në vitin 1999.

Në takimin e ftuar nga kryeministri Kurti, të pranishëm ishin: z.Bajram Kosumi, znj.Besë Ahmeti, Dije Lohaj, Enver Dugolli, Fatmir Humolli, Gani Krasniqi, Hydajet Hyseni, Jonuz Jonuzi, Naime Naqestena, Ramadan Gashi, Salih Salihu, Sami Kurteshi, Shqipe Selimi, Shukrije Gashi, Teutë Hadri dhe Xhevat Bislimi./arbresh.info/