Sot është bërë prezantimi i Programit të Bursës së Mobilitetit për Studentë para studentëve përfitues, në një aktivitet ku kanë marrë pjesë kryeministri në detyrë, Albin Kurti, dhe ministri në detyrë i Financave, Punës dhe Transfereve, Hekuran Murati.

Qeveria në detyrë e Kosovës ka ndarë 1.65 milionë euro për grupin e parë prej 10 mijë studentësh përfitues, në kuadër të këtij programi që synon lehtësimin e shpenzimeve të transportit për studentët.

Ministri në detyrë, Hekuran Murati, tha se kjo është një masë e punuar me kujdes dhe se studentët e pranishëm janë përfituesit e parë të saj.

“Është një masë për të cilën kemi punuar dhe ju jeni përfituesit e parë, andaj ju përgëzoj,” u shpreh Murati.

Ndërkaq, kryeministri në detyrë, Albin Kurti, theksoi rëndësinë e mbështetjes së studentëve, duke e cilësuar transportin si një barrë të përditshme për shumë familje.

“Është kënaqësi të jem bashkë me ju dhe ta ndajmë këtë rrugëtim tuajin akademik dhe profesional. Për shumë familje, shpenzimet e përditshme të transportit janë barrë,” tha Kurti.

Ai shtoi se Bursa e Mobilitetit nuk është masa e vetme për studentët, duke përmendur edhe mbështetjen financiare prej 100 eurosh si dhe fuqizimin e skemës së bursave STEM.

“Studentë të dashur, ju jeni pasuria më e madhe e këtij vendi. Gjendja juaj sot tregon se çfarë do të jetë e ardhmja jonë,” deklaroi Kurti.

Sipas tij, gjatë këtij mandati janë ndarë afro 18 mijë bursa, ndërsa në të ardhmen numri i tyre pritet të dyfishohet.

“Presim përkushtim dhe besim nga ana juaj. Ju uroj suksese në studime dhe qeveria do të vazhdojë të qëndrojë pranë jush,” përfundoi Kurti./Arbresh.info