Kryeministri i Kosovës, Albin Kurti, është takuar me emisarin e BE-së për dialogun, Miroslav Lajçak.

Ky takim ka ndodhur në Sllovaki, në kuadër të punimeve të GLOBSEC 2022, ku po merr pjesë edhe Kryeministri i Republikës së Kosovës Albin Kurti.

Me anë të nje postimi në Twitter, kryeministri Kurti ka thënë se me emisarin Lajçak kanë bisedime të rregullta si pjesë e dialogut parimor dhe konstruktiv në Bruksel.

Në këtë takim Kurti ka përmendur edhe angazhimin e Kosovës  për një marrëveshje me Serbinë me qendër njohjen reciproke.

“Ne kemi bisedime të rregullta me Miroslav Lajçak si pjesë e dialogut tonë parimor dhe konstruktiv në Bruksel. Këtë herë u takuam në vendin e Lajçakut , Sllovaki në GLOBSEC2022 ku ritheksova angazhimin tonë për një marrëveshje me Serbinë me qendër njohjen reciproke”, ka shkruar Kurti./arbresh.info/