Kryeministri i Kosovës, Albin Kurti, së bashku me zëvendëskryeministren Emilija Rexhepi, mirëpritën sot grupin e parë të qytetarëve nga Bosnje dhe Hercegovina që udhëtuan në Kosovë vetëm me letërnjoftime, duke shënuar një moment historik në marrëdhëniet mes dy vendeve.

Takimi u mbajt në ndërtesën e Qeverisë, në Prishtinë, pas hyrjes në fuqi të vendimit të ri të qeverisë kosovare, që lehtëson qarkullimin e qytetarëve mes këtyre dy vendeve.

Postimi i plotë i kryeministrit:

Në takimin e parë për këtë vit në Ndërtesën e Qeverisë, së bashku me zëvendëskryeministren Rexhepi mirëpritën grupin e parë të qytetarëve nga Bosnje dhe Hercegovina që udhëtuan në Kosovë me letërnjoftime, me të hyrë në fuqi vendimi ynë i qeverisë. Në mesnatë, në minutën e parë kur hymë në vitin 2025 ata hynë në territorin e Republikës së Kosovës.

Rreth 12 mijë shqiptarë që jetojnë në Bosnje dhe Hercegovinë, nga 1 janari i këtij viti mund të vijnë më lehtë në Kosovë për t’u rilidhur me rrënjët e tyre, kurse rreth 27 mijë boshnjakë që jetojnë në vendin tonë mund të mirëpresin më shpesh për vizita familjarët dhe farefisin e tyre.

Republika e Kosovës dhe Bosnje dhe Hercegovina kanë nevojë për ura të reja ekonomike, arsimore e kulturore që i shërbejnë sigurisë së rajonit dhe mirëqenies së të gjithë qytetarëve. Ato ura duhet t’i ndërtojë Prishtina dhe Sarajeva. Nga sot fillon një kapitull i ri i ndërveprimit ndërmjet dy vendeve tona.

Ju uroj mirëseardhje të gjithë qytetarëve të Bosnje dhe Hercegovinës që udhëtojnë drejt Kosovës. Janë të mirëpritur kurdo herë./Arbresh.info