Kryeministri i Kosovës, Albin Kurti, priti në takim ministren e Punëve të Jashtme të Republikës së Shqipërisë, Elisa Spiropali.

Gjatë takimit u theksua rëndësia e projekteve strategjike infrastrukturore, në veçanti hekurudha Gjakovë–Shkodër, e cila do të jetë prioritet i këtij mandati, me synimin që punimet për ndërtimin e saj të nisin sa më parë. Ky projekt u vlerësua si një investim me rëndësi të madhe ekonomike dhe rajonale, që do të forcojë lidhjet mes Kosovës dhe Shqipërisë, do të rrisë qarkullimin e mallrave dhe njerëzve, si dhe do të kontribuojë në zhvillimin e qëndrueshëm të të dy vendeve, njofton zyra për informim e Kryeministrit.

Po ashtu, u theksua nevoja për vazhdimin e mbledhjeve të përbashkëta ndërqeveritare (G2G), me synimin që një e tillë të organizohet gjatë vitit 2026. Në takim u diskutua edhe për koordinimin e politikës së jashtme dhe mbështetjen e ndërsjellë në organizata dhe forume ndërkombëtare, si dhe për forcimin e bashkëpunimit lidhur me diasporën shqiptare, veçanërisht në promovimin e gjuhës dhe kulturës tek gjeneratat e reja.

Gjithashtu, bëhet e ditur se të dy palët u dakorduan se diaspora mbetet një faktor i rëndësishëm për zhvillimin ekonomik, diplomatik dhe kulturor të të dy shteteve dhe kërkon angazhim të përbashkët dhe strategji të koordinuar.