Kompania Rajonale e Ujësjellësit “Mitrovica” ka njoftuar se, me hyrjen në sezonën verore dhe rritjen e konsumit të ujit, po përballet me vështirësi në furnizimin e rregullt të zonave dhe pikave të larta me ujë për pije.

Në njoftim theksohet se rritja e konsumit lidhet edhe me, siç thuhet, keqpërdorimet e ujit të pijes, ndaj nga sot kërkohet zbatim rigoroz i masave kundër këtij fenomeni.

“Me qëllim të mbrojtjes së burimeve ujore, garantimit të furnizimit të barabartë për të gjithë qytetarët dhe përdorimit të ujit të pijes vetëm për qëllimet për të cilat është i dedikuar – pije, higjienë personale dhe përgatitje të ushqimit – nga sot kërkohet zbatim rigoroz i masave kundër keqpërdorimit të ujit”, thuhet në njoftim.

Kompania paralajmëron se konsumatorët që zihen duke përdorur ujin e pijes për qëllime të palejuara do të shkyçen nga rrjeti i ujësjellësit, pavarësisht nëse konsumimi regjistrohet me ujëmatës dhe nëse pagesat janë të rregullta.

“Çdo konsumator që haset duke përdorur ujin e pijes për qëllime të palejuara, si ujitja e kopshteve, mbushja e pishinave, larja e trotuareve, larja e automjeteve apo aktivitete të tjera që cenojnë furnizimin e rregullt të qytetarëve me ujë për pije, duhet të shkyçet nga rrjeti i ujësjellësit, pavarësisht se uji regjistrohet përmes ujëmatësit dhe konsumatori është i rregullt me pagesa ndaj KRU-së”, thuhet më tej.

KRU “Mitrovica” u ka bërë thirrje qytetarëve për përdorim të kujdesshëm dhe racional të ujit, duke e cilësuar ujin e pijes si “pasuri të përbashkët” dhe “burim jetik”.

“Uji i pijes është një pasuri e përbashkët dhe një burim jetik, ndaj secili prej nesh ka përgjegjësi sociale dhe qytetare për ta përdorur atë në mënyrë të kujdesshme dhe racionale, duke respektuar nevojat e të gjithë konsumatorëve”, thuhet në njoftim.

Kompania ka kërkuar respektim maksimal të masave dhe angazhim të përbashkët për ruajtjen e burimeve ujore. /Telegrafi/