Kryetari i Partisë Demokratike Kosovës (PDK) Memli Krasniqi i ka shprehur shqetësimin kryetarit të Kuvendit të Maqedonisë së Veriut, Afrim Gashi për arrestimin e veteranëve të UÇK-sënë këtë shtet.

Me anë të një postimi në Facebook, Krasniqi tha se ky veprim është i papranueshëm dhe cenon raportet ndërshtetërore mes të dyja vendeve, shkruan Arbresh.info.

Tutje, ai ka kërkuar që faktori shqiptar të angazhohet në ndaljen e përndjekjeve.

“Në këtë takim, shpreha shqetësimin lidhur me arrestimin e veteranëve të UÇK-së në Maqedoninë e Veriut, veprim ky i papranueshëm që cenon raportet tona ndërshtetërore, me ç’rast kërkova që faktori shqiptar atje të angazhohet fuqishëm për ndaljen e këtyre përndjekjeve”, ka shkruar ai.

Sipas tij, partia që ai drejton mbetet e përkushtuar në ruajtjen e raporteve të mira dhe fqinjësore me Maqedoninë e Veriut.

“Sidomos me spektrin politik shqiptar në bashkërendimin e politikave të përbashkëta në të mirë të fuqizimit të shqiptarëve në rajon. Kryetarit Gashi i urova punë të mbarë, që si kryetar i Kuvendit të Maqedonisë së Veriut, të ndihmojë në realizimin e ambicieve dhe të drejtave të qytetarëve shqiptarë atje”, shkroi Krasniqi./Arbresh.info/