Shkaku i çmimit jonormalisht të ulët, Organi Shqyrtues i Prokurimit ka anuluar tenderin e Korporatës Energjetike të Kosovës për “Furnizim me kushineta për nxehje të ajrit”.

Kjo pasi KEK-u për blerjen e dy kushinetave kishte planifikuar 30 mijë euro, ndërsa kishte rekomanduar për kontratë kompaninë “Eldi-Com”, e cila kishte ofertuar me çmimin 3 mijë e 894 euro, shkruan sot “Koha Ditore”.

Në këtë aktivitet kishin ofertuar edhe tri kompani të tjera, kompania “Auto Fita”, me ofertën 5 mijë e 192 euro, kompania “SNR” me ofertën 13 mijë e 334 euro, si dhe kompania “Eco Trade”, e cila kishte ofertuar me çmimin 20 mijë e 768 euro.

OSHP-ja ka konstatuar se nuk është e mundur që AK-ja t’i planifikojë për 2 kushineta 30 mijë euro, ndërsa t’i vijë një ofertë me 3 mijë e 894 euro.

“Ose ka qenë planifikim i gabuar, ose oferta nuk është sipas kërkesave të AK-së, andaj gjatë rivlerësimit AK-ja t’i vërtetojë këto pretendime dhe të vërtetojë saktë me dëshmi se ku ka qenë gabimi ose planifikimi, ose tek ofertuesi”, thuhet në vendim. Aty thuhet se nuk është hera e parë që AK-ja ka prokuruar këtë lloj kushinete dhe se ajo ka qenë e njoftuar për çmimet e tyre.