Katër persona kanë pësuar lëndime trupore si pasojë e një aksidenti trafiku që ka ndodhur sonte në fshatin Zborc të komunës së Shtimes.

Zëdhënësi i Policisë për rajonin e Ferizajt, Kanun Veseli, ka bërë të ditur se aksidenti ka ndodhur rreth orës 20:00 dhe në të janë përfshirë dy automjete, njëra prej të cilave me targa të huaja.

“Sot, rreth orës 20:00, në fshatin Zborc të komunës së Shtimes ka ndodhur një aksident trafiku ku janë përfshirë dy vetura, njëra prej tyre me targa të huaja. Si pasojë e aksidentit janë shkaktuar dëme materiale në të dy automjetet, ndërsa katër persona kanë pësuar lëndime trupore”, ka deklaruar Veseli.

Ai ka bërë të ditur se në vendin e ngjarjes kanë dalë njësitet e Policisë së Komunikacionit Rrugor, të cilat kanë kryer këqyrjen e vendit të ngjarjes dhe po hetojnë rrethanat që kanë çuar deri te aksidenti.