Kryetari i Lidhjes Demokratike të Kosovës, Isa Mustafa pas mbledhjes së kryesisë së LDK-së, ka thënë se LDK-ja, do ta ndihmojë procesin e ratifikimit të marrëveshjes së demarkacionit por vetëm në momentin kur koalicioni qeverisës i siguron që ky i fundit i ka votat për ratifikim të kësaj marrëveshje, shkruan arbresh.info.

Ai ka thënë se në momentin kur koalicioni qeverisës i siguron votat, LDK-ja merr përgjegjësinë para qyettarëve që ta ndihmojë këtë proces.

“Ne si LDK vlerësojmë se është përgjegjësi e koalicionit qeverisës që ata të sigurojnë se i kanë votat dhe kanë disponimin që ta përkrahin këtë marrëveshje dhe të ratifikohet, dhe nëse ne sigurohemi që koalicioni qeverisës i ka siguruar votat atëherë edhe ne marrim përgjegjësinë para qytetarëve që edhe ne ta ndihmojmë këtë proces nga arsyeja se ne si LDK konsiderojmë se procesi është i pastër , se marrëveshja e parë e ka saktësuar kufirin dhe kufiri është i saktë”, ka thënë ai.

Mustafa, ka deklaruar se dëshirojnë që qytetarët e Kosovës të lëvizin lirshëm pa viza sa më shpejtë.

“Në këtë rast është përgjegjësia e kryeministrit që ai të sigurojë votat së bashku me partnerët e koalicionit dhe është çështje e jona që ne karshi vlerësimeve tona ta ndihmojmë këtë proces sepse dëshirojmë që qytetarët e Republikës së Kosovës të udhëtojnë lirshëm, të lëvizin lirshëm por asesi që të luhen lojëra, por që puna të bëhet”, ka thënë ai./arbresh.info/