Instituti Kombëtar i Shëndetësisë Publike ka njoftuar se gjatë këtij viti janë regjistruar 19 raste të reja me HIV/AIDS në Kosovë, ku 16 janë rastë të gjinisë mashkullore dhe tri të gjinisë femërore.

Sivjet ka vdekur një person si pasojë e AIDS’it.

IKSHPK ka sqaruar se HIV është virus që sulmon sistemin imunitar dhe, nëse nuk trajtohet, çon në AIDS – fazën më të rëndë të infeksionit.

Nuk ka shërim, por me trajtim të rregullt, personat HIV pozitiv mund të jetojnë gjatë dhe shëndetshëm, si dhe të mos e bartin virusin tek të tjerët”, thuhet në njoftim.

Aty është sqaruar edhe si bartet ky virus:

– Marrëdhënie seksuale pa mbrojtje

– Përdorim i përbashkët i shiringave/gjilpërave

– Nga nëna tek fëmija gjatë shtatzënisë, lindjes ose gjidhënies.

“HIV nuk bartet përmes: përqafimit, shtrëngimit të dorës, ushqimit të përbashkët, ujit, ajrit apo pickimit të mushkonjave”, theksohet në njoftim.

Për të parandaluar bartjen e këtij virus:

– Përdorni kondom gjatë çdo kontakti seksual

– Përdorni vetëm mjete sterile për injektim

– Testohuni rregullisht në qendrat për këshillim dhe testim vullnetar (falas, anonim, konfidencial)

Qendrat për testim gjenden në: Klinika Infektive QKUK, Qendra e Studentëve UP, Prishtinë, OJQ Labirinti (Prishtinë, Prizren, Gjilan) dhe CSGD Prishtinë.