Kryeministri i Republikës së Kosovës, Avdullah Hoti, ka pritur sot në takim lamtumirës ambasadorin e Hungarisë në Kosovë, László Márkusz.

Kryeministri Hoti e falënderoi ambasadorin Márkusz për punën e tij të përkushtuar në Kosovë, si dhe për përkrahjen e përhershme që Hungaria i ka dhënë vendit tonë, transmeton arbresh.info

Gjatë këtij takimi, Kryeministri Hoti e njoftoi ambasadorin e Hungarisë Márkusz për prioritet e Qeverisë së Kosovës dhe për hapat që po ndërmerren për menaxhimin e pandemisë Covid 19 dhe për rimëkëmbjen e ekonomisë së vendit.

Po ashtu, Kryeministri Hoti potencoi se Kosova dhe Hungaria i kanë të gjithë mundësitë që ta intensifikojnë bashkëpunimin në mes të dyja vendeve, sidomos në sektorin ekonomik, në infrastrukturë, në arsim etj.

Duke i uruar ambasadorit László Márkusz suksese në detyrat e tij të ardhshme, kryeministri Hoti tha se institucionet dhe qytetarët e Kosovës, dhe ai personalisht, e vlerësojnë lart punën e ambasadorit Márkusz gjatë mandatit të tij në Kosovë.

Ndërsa, ambasadori Márkusz, pasi e falënderoi kryeministrin Hoti për këtë takim lamtumirës dhe për bashkëpunimin e mirë me Qeverinë e Kosovës, shprehu bindjen se marrëdhëniet në mes Hungarisë dhe Kosovës do të thellohen edhe më tej.

“Për Hungarinë, Kosova dhe i gjithë Ballkani Perëndimor jo vetëm gjeografikisht, por edhe historikisht e kulturalisht janë pjesë e Evropës, ndaj ne vlerësojmë se e ardhmja juaj e përbashkët është në Bashkimin Evropian”, tha ambasadori Márkusz./arbresh.info/