Kryetari i Gjilanit, Lutfi Haziri ka uruar të gjithë qytetarët me rastin e festës së Fitër Bajramit.

Haziri këtë e ka bërë përmes një postimi në llogarinë e tij në Facebook, transmeton arbresh.info

“Më lejoni që t’ju urojë festën e Fitër Bajramit me lutjen që Zoti t’ua ketë pranuar agjërimin, sakrificën dhe mundin tuaj, duke u bërë shembull i solidaritetit me të uriturit, të varfrit dhe ata që sfidohen në jetë”, ka shkruar Haziri.

Gjithashtu i pari i Gjilanit ka bërë thirrje që të respektohen masat anti-Covid, duke bërë mbajtjen e maskave dhe distancën sociale.

“Kjo festë Gjilanin, Kosovën dhe mbarë botën e gjen sërish në përballje me pandeminë COVID-19. Andaj, apeloj që t’i respektoni masat kundër përhapjes së virusit, bartjen e maskave e mbajtjen e distancës sociale”, ka thënë ai.

Postimi i plotë:

Të nderuar qytetarë të komunës së Gjilanit,

Të nderuar bashkatdhetarë kudo që jeni, në Europë, Amerikë e në botë,

I nderuar kryetar i Bashkësisë Islame në Gjilan, efendi Naim Aliu,

Të nderuar imamë të xhamive të komunës sonë,

Më lejoni që t’ju urojë festën e Fitër Bajramit me lutjen që Zoti t’ua ketë pranuar agjërimin, sakrificën dhe mundin tuaj, duke u bërë shembull i solidaritetit me të uriturit, të varfrit dhe ata që sfidohen në jetë.

Është obligim dhe zotim i këtij muaji që po e mbyllim që lutjet dhe solidariteti të vazhdojë për çdo familje.

Ne e kemi për obligim qytetar e njerëzor ndaj vetës, familjes dhe ndaj Zotit, që çdokujt t’i ofrojmë sofër të bollshme, mundësi pune e jete të barabartë për të gjithë. Mos i harroni duatë për ditë më të mira që Zoti xh,sh. ta fal e ruaj çdo njeri të mirë.

Kjo festë Gjilanin, Kosovën dhe mbarë botën e gjen sërish në përballje me pandeminë COVID-19. Andaj, apeloj që t’i respektoni masat kundër përhapjes së virusit, bartjen e maskave e mbajtjen e distancës sociale.

Ky virus është akoma ne mesin tonë dhe po ua prezantoj pasqyrën e përgjithshme në Gjilan që prej fillimit të pandemisë: nga 20897 mostra, 6371 gjilanas kanë rezultuar pozitivë, 6145 janë shëruar, 144 qytetarë e kanë humbur betejën me virusin, 82 raste janë aktive, të hospitalizuar me COVID janë 25 dhe 61 mostra në pritje për rezultat. Festo me masa anti-COVID-19!