Ministrja e Drejtësisë, Albulena Haxhiu ka reaguar ndaj deklaraëts së kryeministrit të Shqipërisë, Edi Rama i cili tha se KFOR-i duhet të marrë në kontroll  veriun e Kosovës.

Me anë të një postimi në Facebook, Haxhiu tha se marrja e kontrollit të veriut nga KFOR-i nuk është e nevojshme, shkruan Arbresh.info.

Sipas saj, ajo çka nevojitet janë patrullimet e përbashkëta mes Policisë së Kosovës dhe KFOR-it përgjatë kufirit me Serbinë, “sepse prej andej vjen armatimi, municioni dhe mercenarët që duan luftë.”

“Kosova është Republikë e pavarur dhe sovrane. Mbikqyrja ndërkombëtare e pavarësisë ka përfunduar më 10 shtator 2012. Në veri të Kosovës, terroristët dhe kriminelët nga Serbia vranë rreshterin e Policisë së Kosovës Afrim Bunjaku në pritë në ora 3 pasmesnate të dielen që shkoi. Gjatë luftimeve të mëpastajme, ata nuk kishin kurrfarë shansi me Policinë e Kosovës. Së paku tre terroristë u vranë, kurse të tjerët ose janë arrestuar (gjashtë sosh) ose janë në ndjekje (sepse janë në ikje). Nuk ka nevojë që KFOR-i ta marrë nën kontroll veriun e Kosovës. Ajo që nevojitet janë patrullimet e përbashkëta të Policisë së Kosovës me KFOR-in përgjatë kufirit me Serbinë, sepse prej andej vjen armatimi, municioni dhe mercenarët që duan luftë.”, u shpreh Haxhiu.

Tutje ministrja Haxhiu tha se Policia e Kosovës në koordinim me KFOR-in do t’i zmbrapsin qëllimet për destabilizim të Kosovës  “të gatuara” në Moskë e Beograd.

“Republika e Kosovës dhe NATO janë partnerë strategjik dhe i shërbejnë të njëjtit qëllim e botëkuptim të sigurisë së demokracive. KFOR-i dhe Policia e Republikës natyrshëm janë një familje dhe bashkërisht e në koordinim do i zmbrapsin qëllimet për destabilizim të Republikës sonë të gatuara në Moskë e Beograd.”

Ndër të tjera, ajo ka falënderuar Shqipërinë dhe shqiptarët për mbështetje dhe solidaritet.

Ndryshe, kryeministri i Shqipërisë, Edi Rama në një konferencë për sulmet në veri tha se KFOR-i duhet të marrë kontroll veriun e Kosovës, duke thënë se këtë propozim e ka dhënë edhe në samitin e NATO-s.

“KFOR-i duhet të marrë në kontroll veriun. Çdo hezitim dhe vonesë dhe me argumentin e orëve të fundit se kemi apo jo trupa mund ta bëjë ndërhyrjen e nesërme të KFOR-it shumë më të madhe në trupa dhe vështirësi. Prandaj jam këtu sot dhe më vjen mirë që këtë e kërkon edhe Kosova KFOR-in në veri”, ka thënë kryeministri shqiptar, Edi Rama./Arbresh.info

Rama: KFOR të marrë nën kontroll veriun e Kosovës