Kryeministri i vendit, Ramush Haradinaj, ka deklaruar se nuk do të pranohet asnjë marrëveshje me Serbinë për korrigjim të kufijve.

Haradinaj në studion e “Opinion”, tha se nuk e konsideron projekt serioz një ide të tillë, për ndryshimin e kufinjve.

“Të gjitha këto që kanë ndodhur, nuk më lejojnë të mendoj se presidenti Thaçi e ka menduar si një projekt serioz. Unë mendoj se është një taktikë politike e tij”.

Haradinaj u shpreh se për një marrëveshje të tillë me Serbinë është dhe do të jetë kundër.

“Ne respektojmë vlerat e serbëve të Kosovës. Përkundër të kaluarës tonë tragjike. Ne nuk do të shkojmë tek zgjidhja deri tek korrigjimet në territor”.

“Ne nuk e hapim të kaluarën tonë. Nuk ka kthim pas, edhe vendet që nuk na njohin, vitin që vjen, këto vende do të na njohin. Ne do të luftojmë për t’u bërë anëtarë të NATO-s”.

“Vetëm çizmet vendosin kufijtë, fuqia, forca. Hapja e kufijve për Kosovën është e disfavorshme, nuk bëhet fjalë. Ne nuk do të lejojmë të preken kufijtë tanë”./Opinion.al