Kryeministri i Republikës së Kosovës, Ramush Haradinaj, në margjina të Forumit të Dubrovnikut, sot ka zhvilluar takim bilateral me ambasadorin e Kanadasë në BE, Daniel Costello.

Gjatë takimit, kryeministri Haradinaj vlerësoi përkrahjen e Kanadasë për Kosovën në të gjitha periudhat, ndërsa kërkoi mbështetje të mëtutjeshme edhe për proceset nëpër të cilat po kalon Republika e Kosovës në këtë periudhë.

Haradinaj e ka njoftuar ambasadorin Costello, për të arriturat e Kosovës, për prioritet e Qeverisë, zhvillimin ekonomik, për orientimin euroatlantik të saj, në të njëjtën kohë edhe angazhimin e saj për anëtarësim në organizata ndërkombëtare.

“Qeveria e Kosovës është duke punuar me partnerët e saj ndërkombëtarë për forcimin e subjektivitetit ndërkombëtar të shtetit, andaj përkrahja e Kanadasë në këtë aspekt është e rëndësishme”, tha kryeministri Haradinaj, duke kërkuar nga ambasadori Costello mbështetjen e shtetit të tij për anëtarësimin e Kosovës në organizatat ndërkombëtare.

Duke vlerësuar marrëdhëniet e mira bilaterale ndërmjet dy vendeve, kryeministri Haradinaj ka shprehur gatishmërinë e Qeverisë për avancimin e raporteve bilaterale edhe në rrafshin ekonomik dhe në fusha tjera të interesit reciprok.

Nga ana e tij, Ambasadori i Kanadasë në BE, Daniel Costello, pasi e falënderoi kryeministrin Haradinaj për fjalimin thelbësor në Forumin e Dubrovnikut, i vlerësoi të arriturat e Kosovës, duke shtuar se vendi i tij do të vazhdojë mbështetjen e Kosovës në të gjitha fushat.