Medreseja e Mesme “Alaudin”, në Prishtinë ka organizuar garat e Kuranit në kategoritë: lexim dhe hifz, në nivel të medreseve në Ballkan.

Vendet pjesëmarrëse në këto gara përveç Kosovës janë edhe Shqipëria, Turqia, Maqedonia, Mali i Zi, Kroacia, Bullgaria dhe Sanxhaku.
Këto gara janë hapur me lexim të një pjese të Kuranit.

Myftiu i Kosovës, Naim Tërnava ka thënë se kjo medrese dha shumë për vendin tonë. Sipas tij Kurani është dritë e Zotit, krijues i këtij universi.
“Me leximin e tij fitojmë shpërblime të ndryshme. Lexo se Zoti yt është më bujari. Kurani është fuqi e një ringjalljeje. Është mirësia më e madhe që njeriu mysliman e kujton Allahun. Sa më shumë të lexohet aq më shumë shtohet dashuria ndaj tij”, ka thënë ai, përcjell arbresh.info.

Sipas Tërnavës leximi i një shkronje nga Kurani ka shumë vlerë.

Tërnava ka deklaruar se sot nuk ka vend në botë që jetojnë mysliman e të mos ketë hifz të Kuranit.

Jakup Çunaku drejtor i Medresesë së Mesme “Alaudin”,  tha se nga sot kjo ditë do të shkruhet në historinë e shkollës dhe vendit tonë.

Sipas tij kjo është ngjarje e suksesshme dhe vepër e mirë tek Zoti.

“Kurani është dritë dhe mëshirë. Të punuarit me të është obligim e pastaj edhe nder e krenari”, ka thënë ai.

Garat do të zhvillohen në katër kategori , ndërsa do të zgjasin deri më 22 prill./arbresh.info