Kandidati për kryeministër nga Partia Demokratike e Kosovës, Bedri Hamza është pritur sot në një tubim nga qytetarët e Prizrenit.

Me anë të një postimi në Facebook, Hamza tha se mezi pret të dëshmoj që Kosova mundet ma mirë, përcjell Arbresh.info.

“Mikpritje e ngrohtë në qytetin e bukur të Prizrenit. Edhe pak ditë na ndajnë nga fitorja jonë. Mezi po presim ta dëshmojmë që Kosova mundet ma mirë. Besoni në këtë. Kontribuoni për këtë. Votoni për numrin 131. Unë do të jem kryeministër i çdo qytetari dhe për çdo qytetar, në çdo anë të Kosovës”, shkroi Hamza.

“Është nder e kënaqësi të jem në qytetin e bukur të Prizrenit, qytet jo vetëm i historisë, por edhe i bashkimit për liri, për barazi, për përparim e për integrim. Mbi këto parime e kam ndërtuar edhe vizionin tim për Kosovën dhe me këto parime do të qeveris si Kryeministri Juaj. Do të angazhohemi për rimëkëmbjen e sheshit “Shatërvan”. Për rregullimin e unazës së qytetit, për lidhjen e autostradës dhe hapjen e rrugës së re tranzitore. Do të punojmë të sigurojmë rezerva të mjaftueshme të ujit, që qyteti mos ta ketë më këtë shqetësim për dekadat e ardhshme. Pra, do të punojmë për çdo qytetar, për tërë Kosovën. Ky nuk është vetëm një plan. Ky është premtimi që do ta mbajmë!”, ka thënë Hamza në Prizren./Arbresh.info