Deputeti i LVV-së, Enver Haliti, ka shprehur bindjen se ndërkombëtarët po bëjnë presionin ndaj Serbisë dhe jo vetëm ndaj Kosovës. Haliti vlerëson se ndërkombëtarët e kanë parë se Serbia është faktori kryesor i destabilitetit në rajon.

Deputeti i LVV-së, Enver Haliti  ka thënë se presioni ndaj Kosovës ka qenë i paparë, por që sipas tij gjërat kanë filluar të lëvizin.

“Sa i përket masave se presioni ka qenë i paparë. Dihet mirëfilli që Serbia është ajo që i ka bojkotuar zgjedhjet dhe ajo që i ka i ka detyruar ata kryetarët të japin dorëheqje nga pozitat që kanë pasur dhe të tjerëve në polici, gjyqësi e prokurori. Faji ka qenë në anën e Serbisë. Ndërsa kohëve të fundit po e shohim se ia ka vlejtur qëndrueshmëria e Qeverisë sonë për shkak se situata po kthehet në favor të Kosovës”.

Haliti gjithashtu shprehet se presioni nga ndërkombëtarët tashmë është më i balancuar dhe po kthehet kryesisht ndaj Serbisë, pasi politika e Beogradit po tenton të destabilizojë vende të tjera në rajon.

Ai shpreh optimizmin se SHBA dhe BE po vërejnë rolin e Serbisë si faktor destabiliteti dhe se presioni do të orientohet gjithnjë e më shumë ndaj Serbisë në të ardhmen.

“E shohim se presioni nga ndërkombëtarët është më i balancuar, ka presion edhe ndaj Serbisë dhe e konsiderojë që ditëve në vijmë do të jetë i orientuar ndaj Serbisë, për shkak se shohim edhe zhvillimet në rajon”.

“Nëse marrim shembull Bosnjën dhe Malin e  Zi shohim që politika e Beogradit po e shtrin ndikim përmes Kishës dhe përmes Republikës Srpska në Bosnjë që t’i destabilizojë ato shtete dhe në sytë e ndërkombëtarëve po kemi lëvizje pozitive dhe po e shohin që faktori destabiliteti është Serbia”.

Haliti thotë se deklarata e Macronit më shumë lidhet me presionin ndaj Serbisë. Sipas tij është Serbia ajo që ka viza ndërsa Kosova ende nuk i ka vizat dhe se ne nuk mund të kërcënohemi për diçka që nuk e kemi./RTV Dukagjini/