Gjermania, Franca dhe Polonia, kanë bërë një deklaratë të përbashkët sot ku kanë bërë thirrje për liberalizimin e vizave për Kosovën.

“Ne bëjmë thirrje për progres në lidhje me liberalizimin e vizave për Kosovën”, thotë komunikata.

Në një deklaratë të përbashkët të ministrive të jashtme të Gjermanisë, Francës dhe Polonisë, thuhet se të tri shtetet e mbështesin dialogun Kosovë-Serbi dhe integrimin evropian të këtyre dy shteteve.

“Trekëndëshi i Ëeimarit” thotë se e mbështet plotësisht dialogun ndërmjet Kosovës dhe Serbisë dhe thekson “nevojën për një marrëveshje gjithëpërfshirëse që i mundëson Kosovës dhe Serbisë të avancojnë në rrugëtimin e tyre evropian”.

“Ne mbështesim plotësisht dialogun Kosovë-Serbi të udhëhequr nga BE-ja dhe theksojmë nevojën për një marrëveshje gjithëpërfshirëse që i mundëson Kosovës dhe Serbisë të avancojnë në rrugëtimin e tyre evropian dhe të kontribuojnë në stabilitetin në rajon”- bëhet e ditur në këtë komunikatë.

Po ashtu, në komunikatë thuhet se këto vende janë të përkushtuara fuqishëm ndaj Procesit të Berlinit.

“Ne theksojmë rëndësinë e zbatimit të vendimit historik nga gjashtë vendet e Ballkanit Perëndimor për të krijuar një treg të përbashkët rajonal”, thuhet në komunikatën e përbashkët të ministrive të jashtme gjermane, franceze dhe polake.