Shërbimi i Kërkim-Shpëtimit Malor i Kosovës ka qenë pjesë e një operacioni kërkim- shpëtimit në afërsi të fshatit Çajë, ne zonën e Kukësit në Shqipëri.

Sipas njoftimit, për më shumë se 13 orë në aksion, është bërë lokalizimi i dy turistëve zviceran të cilët si pasojë e reshjeve të dendura të borës në ditët e fundit, kanë pësuar nga orteku i cili i ka zënë brenda, shkruan Arbresh.info.

“Në orët e vona të mesnatës është bërë nxjerrja e tyre nga orteku nga anëtarët e ShKShMK-së, ku rrezikshmëria dhe zona tepër e papërshtatshme për intervenim dhe logjistikë, e kanë bërë këtë aksion tepër të ndërlikuar.”, thuhet në njoftim.

ShKShMK njofton se turistët janë në gjendje stabile shëndetësore, duke pësuar hipotermi dhe dyshohet për fraktura të gjymtyrëve, të cilat mbesin të vërtetohen nga ekzaminimet e mëtutjeshme mjekësore.

“Pritet të bëhet evakuimi i tyre permes helikopterit të Emergjencave Shtetërore të Shqipërisë. Për informata më të hollësishme ju njoftojmë me kohë.”, thuhet në njoftim./Arbresh.info/