Policia e Republikës së Kosovës ka bërë të ditur se turni i parë i zyrtarëve policor të Policisë së Kosovës, gjegjësisht të Njësive Rajonale të Komunikacionit Rrugor (NJRKRR) dhe Njësisë për Kontroll të Autostradave (NJKA), do të udhëtojnë sot për në Republikën e Shqipërisë për patrullime të përbashkëta.

“Referuar bashkëpunimit të vazhdueshëm të Policisë së Kosovës me Policinë e Shtetit të Republikës së Shqipërisë bazuar edhe në memorandumin e bashkëpunimit të firmosur nga autoritetet policore, respektivisht nga dy drejtorët e Policive të të dyja shteteve tona Rashit Qalaj dhe Ardi Veliu rreth një muaj më parë, për organizimin e shërbimeve të përbashkëta të policimit rrugor në Republikën e Shqipërisë gjatë sezonit veror”, thekson Policia.

Takimi informativ me zyrtarë policor do të mbahet në Pikën e Kalimit Kufitar në Vërmicë.

Po ashtu një konferencë për media do të mbahet po në Pikën e Kalimit Kufitar Vërmicë.

Ky patrullim i përbashkët ka për qëllim primar rritjen e efikasitetit të luftës ndaj humbjes së jetëve njerëzore në aksidentet rrugore dhe zbatimin me rigorozitet të legjislacionit rrugor, për krijimin e një ambienti më të sigurt për të gjithë qytetarët dhe përdoruesit e rrugës, që qarkullojnë në akset rrugore që lidhin dy vendet.