Sindikata e Policisë së Kosovës (SPK) ka shprehur shqetësim të madh për mos-ekzekutimin e pagesave për familjet e policëve të rënë gjatë kryerjes së detyrës për muajin dhjetor.

Sipas sindikatës, Drejtoria e Financave kishte kërkuar ndarjen e 290,000 eurove për familjet e policëve të rënë, por Ministria e Financave ende nuk ka ekzekutuar këto mjete.

Sindikata thekson se këto familje janë një kategori e shenjtë dhe e respektuar për vendin, pasi kanë dhënë bijtë dhe bijat e tyre për sigurinë e vendit, ruajtjen e rendit publik dhe mbrojtjen e qytetarëve të Republikës së Kosovës.

Postimi i plotë:

Sindikata e Policisë së Kosovës shpreh shqetësimin e saj të thellë lidhur me mos-pagesën e familjeve të policëve të rënë gjatë kryerjes së detyrës për muajin dhjetor.

Edhe pse nga Drejtoria e Financave është bërë kërkesa zyrtare për ndarjen e mjeteve financiare në vlerë prej 290,000 euro, deri më tani këto mjete nuk janë ekzekutuar nga Ministria e Financave. Si pasojë, familjet e policëve të rënë në detyrë, të cilët janë një kategori e shenjtë dhe e respektuar për vendin tonë, kanë mbetur pa pagesë edhe pas përmbylljes së vitit.

Kjo situatë është e papranueshme dhe e dhimbshme, duke marrë parasysh sakrificën sublime të këtyre familjeve, të cilat kanë dhënë bijtë dhe bijat e tyre për sigurinë e vendit tonë, ruajtjen e rendit publik dhe mbrojtjen e qytetarëve të Republikës së Kosovës.

Sindikata e Policisë së Kosovës u bën thirrje institucioneve përgjegjëse, në veçanti Ministrisë së Financave, që sa më parë të gjejnë zgjidhje dhe të realizojnë pagesat e mbetura, në mënyrë që të mos cenohet dinjiteti dhe mirëqenia e këtyre familjeve.

Sakrifica e policëve të rënë në detyrë nuk duhet dhe nuk guxon të harrohet./Arbresh.info