Kryeministri shqiptar, Edi Rama ka reaguar pas ngritjes së aktakuzës  nga prokurori i Specializuar ndaj Presidentit të Republikës së Kosovës Hashim Thaçi dhe kreut të PDK-së, Kadri Veseli.

Rama, përmes një reagimi në Facebook, ka shkruar se nuk di se si ta shpreh indinjatën e tij përballë akuzave kundër UÇK-së.

“Qëkur e kam marrë lajmin e listës së Tribunalit Special dhe kam lexuar emrat e kriminelëve të supozuar të Luftës Çlirimtare të Kosovës, përpiqem po nuk arrij të formuloj fjalitë e duhura për të shprehur indinjatën time”, ka shkruar Rama.

Ai, po ashtu thotë se është dhe do të jetë deri në fund në krah të të gjithë atyre që luftuan me armë për ta çprangosur Kosovën e burgosur në ferrin e Sllobodan Milosheviçit,

“Do të shprehem publikisht nesër me një mesazh për të gjithë shqiptarët, por jam e do të jem deri në fund, në krah të të gjithë atyre që luftuan me armë për ta çprangosur Kosovën e burgosur në ferrin e Sllobodan Milosheviçit, duke mbyllur me gjak, nder e lavdi një histori padrejtësie historike në zemër të Europës. RROFTË KOSOVA dhe sot më shumë se kurrë NDERIM UDHËHEQËSVE TË LUFTËS ÇLIRIMTARE??????”, ka shkruar kryeministri shqiptar Edi Rama./arbresh.info