Google ADS

E konfirmon Zyra e Prokurorit të Specializuar: Isni Kilaj u arrestua dhe u transferua në Hagë

17:14 | 3 Nëntor 2023
K.B

Zyra e Prokurorit të Specializuar (ZPS) ka arrestuar sot pas një urdhri arrestimi të lëshuar nga Prokurorja e Specializuar, ish kryetarin e Malishevës, Isni Kilaj.

ZPS njofton se ai është transferuar në Objektin e Paraburgimit të Dhomave të Specializuara të Kosovës në Hagë dhe do të dalë para Gjykatësit të Procedurës Paraprake të Dhomave të Specializuara të Kosovës pa vonesa të panevojshme.

“Z. KILAJ u arrestua për vepra penale kundër administrimit të drejtësisë, përfshirë pengimin e personave zyrtarë në kryerjen e detyrave zyrtare brenda kuptimit të nenit 401 të Kodit Penal të Kosovës (KPK) të vitit 2019, Kodi nr. 06/L-074, dhe shkeljen e sekretit të procedurave sipas nenit 392 të KPK-së, dhe nenet 15(2) e 16(3) të Ligjit nr. 05/L-053 për Dhomat e Specializuara dhe Zyrën e Prokurorit të Specializuar”, bën të ditur njoftimi nga ZPS-ja.

Tutje në njoftim thuhet se misioni i Bashkimit Evropian për Sundimin e Ligjit në Kosovë (EULEX) dha mbështetje operative dhe logjistike për ZPS-në në pajtim me mandatin e vet dhe sipas legjislacionit të Kosovës. Edhe Policia e Kosovës dha mbështetje operative për ZPS-në.

“Zyra e Prokurorit të Specializuar e merr jashtëzakonisht seriozisht pengimin e drejtësisë dhe do të vazhdojë të hetojë e ndjekë penalisht cilindo dhe të gjithë ata që përfshihen në çdo rast, përfshirë ata që frikësojnë apo ndërhyjnë tek dëshmitarët, ose ofrojnë mbështetje financiare apo të ndonjë forme tjetër për vepra të tilla penale”, thuhet tutje në njoftim./Arbresh.info/

LEXO EDHE:

Komuna e Malishevës për arrestimin e Kilajt: 400 civilë janë të vrarë në komunën tonë dhe askush s’u dënua

Shpërndaje në rrjete sociale