Ambasadori i Kosovës në Maqedoninë e Veriut, Gjergj Dedaj ka vizituar ish ushtarin e UÇK-së, Tomor Morina, i cili po mbahet në burg nga autoritetet maqedonase si pasojë e një fletë-arresti ndërkombëtar të lëshuar nga Serbia.

Dedaj, përmes një postimi në Facebook, ka thënë se Morina ishte shumë mirë, i qetë dhe me plot vetëbesim dhe pohoi se ai ndihej i pafajshëm. Ambasadori ka falënderuar institucionet për sjelljen korrekte dhe ka shtuar se drejtësia është në anën Morinës dhe se pret që shumë shpejt ai të kthehet në familjen e tij në Kosovë.

“Falënderojmë institucionet e Republikës së Maqedonisë së Veriut, drejtorinë e burgut Shutka në Shkup, për trajtimin korrekt e miqësor, për lejimin e vizitës sonë, ish ushtarit të UÇK-së, Tomor Morina, i ndaluar kohë më parë nga autoritetet e Maqedonisë së Veriut, në bazë të një fletëarresti ndërkombëtar të INTERPOLIT! Tomori ishte shumë mirë, i qetë, ndihej plotësisht i pafajshëm, dinjitoz si dhe optimist, në pritje të lirimit, nga se drejtësia është në anën e tij dhe presim që shumë shpejt do të kthehet në familjen e tij dhe në Kosovë”, shkruar ambasadori Dedaj.

Përpos ambasadorit Dedaj, Morinën paraprakisht e kanë vizituar edhe dy diplomatë të punësuar të ambasadën e Kosovës në Shkup. E leje për të vizituar Morinën nuk kanë mundur të sigurojnë zyrtarët shqiptarë në Qeverinë maqedonase, zëvendëskryeministri Bujar Osmani dhe zëvendësministri Agim Nuhiu.

Përndryshe ditën e djeshme Ministria e Drejtësisë ka dërguar në Gjykatën Penale kërkesën e Serbisë për ekstradimin e Morinës. Përpos kërkesës, në Gjykatën Penale ditë më parë kërkesë për lirimin e Morinës ka dërguar edhe avokati i Morinës, Naser Raufi, nga zyra e të cilit thonë se janë në pritje të kumtimit të rezultatit nëse Morina do të lirohet.