Sekretarja e Përgjithshme e PDK-së, Vlora Çitaku, ka reaguar ashpër ndaj një postimi të Lëvizjes Vetëvendosje, e cila deklaroi se Forca e Sigurisë së Kosovës (FSK) ka zbarkuar për herë të parë në veri të vendit. Çitaku ka akuzuar VV-në për keqpërdorim të një rasti tragjik për qëllime politike, duke e quajtur qasjen e tyre “të neveritshme”.

Në një postim në Facebook, ajo theksoi se FSK nuk ka shkuar në veri për të luftuar, por për të ndihmuar në kërkimin e trupit të një të riu që humbi jetën tragjikisht.

“Jeni të neveritshëm. A keni fije përgjegjësie? A keni fare ndjeshmërie njerëzore? Si mund të abuzoni me vdekjen tragjike të një të riu për propagandë politike? FSK nuk ka shkuar në veri për të luftuar, por për të kërkuar trupin e një djali që humbi jetën tragjikisht. Ashtu siç ka vepruar edhe më parë, me dinjitet dhe pa zhurmë”, ka shkruar Çitaku./Arbresh.info