Ministri i Zhvillimit Ekomomik, Valdrin Lluka është duke raportuar para Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal lidhur me gjendjen në Ndërmarrjen Publike Posta e Kosovës.

E deputeti nga radhët e PDK-së, Memli Krasniqi në këtë komision kërkoi nga ministri i zhvillimit ekonomik Valdrin Lluka një përgjigje nga qeveria për borxhin që e ka ndaj Postës së Kosovës, raporton arbresh.info.

“Qeveria e Kosovës nuk i ka mbushur obligimet që i ka pasur ndaj Postës së Kosovës. Qeveria obligohet rreth 1 milion euro në vit t’i paguaj postës. Ku për pesë vite janë rreth 5 milionë. Situata e postës është duke u përkeqësuar, edhe këtë muaj do të ketë probleme të mëdha me pagat. Duam të marrim përgjigje për borxhin e qeverisë që ka ndaj postës”, u shpreh ai.

Ministri i Zhvillimit Ekonomik në përgjigjen për pyetjen e deputetit Memli Krasniqi ka thënë se nuk ka buxhet që qeveria t’i paguaj 5 milionë euro Postës së Kosovës.

“Është pikëpyetje mundësia buxhetore e qeverisë. Nuk besoj që do të ketë mundësi që të paguhen 5 milionë euro këtë vit. Kom bisedu disa herë për t’i shikuar mundësitë për të gjetur një mes të përbashkët për këtë borxh”, u shpreh ministri Lluka.

/Arbresh.info/