Deputeti i zgjedhur i PDK-së, Abelard Tahiri ka kërkuar formimin e menjëhershëm të institucioneve të reja, pas presidentja Vjosa Osmani caktoi datën 15 prill për konstituimin e Kuvendit të Kosovës.

Me anë të një postimi në Facebook, Tahiri tha se Kosova mundet ma mirë me një qeveri të drejtuar nga Bedri Hamza, e cila sipas tij, do të jetë në gjendje të adresojë efektivisht sfidat e shumta që e presin vendin, përcjell Arbresh.info.

Postimi i plotë:

Më 15 prill, Presidentja ka caktuar datën e konstituimit të Kuvendit të dalë nga zgjedhjet e 9 shkurtit, plot 65 ditë pas mbajtjes së zgjedhjeve.
Kosova gjendet sot përballë një sërë sfidash urgjente dhe shqetësuese:

Kostoja e jetesës po bëhet e papërballueshme për shumë familje. Qytetarët tanë kanë nevojë për një qeveri që vendos mirëqenien dhe interesat e tyre në qendër të agjendës së saj.

Siguria publike është përkeqësuar ndjeshëm. Rritja alarmante e rasteve të vrasjeve dhe krimeve të tjera të rënda po cenon seriozisht e sigurin në shoqërinë tonë.

Sanksionet e Bashkimit Evropian që rëndojnë mbi vendin tonë po dëmtojnë subjektivitetin ndërkombëtar dhe po rrezikojnë të ardhmen euroatlantike të Kosovës.

Në këto kushte, formimi i menjëhershëm i institucioneve të reja me një qasje ndryshe nga ajo që kemi parë gjatë katër viteve të fundit është më se i domosdoshëm.

Kosova mundet #mamirë me një qeveri të drejtuar nga Bedri Hamza, e cila do të jetë në gjendje të adresojë efektivisht sfidat e shumta që e presin vendin.

Qytetarët e Kosovës kanë folur qartë me votën e tyre. Tani është koha për veprim institucional konkret dhe të përgjegjshëm./Arbresh.info

LEXO EDHE:

Osmani cakton 15 prillin si datë për seancën konstituive të Kuvendit