Bashkimi i Sindikatave të Pavarura të Kosovës edhe njëherë ka paralajmëruar se nëse nuk miratohet ligji për njohjen e statutit të mësimdhënësve të viteve 1990-1999, dhe nëse nuk implementohen ligjet aktuale që mbrojnë të drejtat e punëtorëve, do të radikalizojnë veprimet e tyre, duke mos përjashtuar as grevat dhe protestat.

Kryetari i BSPK-së, Haxhi Arifi përmendi të gjitha ligjet që ndikojnë direk në mirëqenien e punëtorëve të cilat, sipas tij, nuk po implementohen. Ndër ligjet për të cilat ai thotë se duhet të miratohen urgjentisht, është ai për mësimdhënësit e viteve të 90-ta. “Të gjithë mësimdhënësit të cilët kanë punuar gjatë kohës së viteve të ’90-a duhet t’u njihet ajo pjesë e punës pasi ata kanë dhënë kontributin e tyre, por duhet dhënë edhe të tjerat benificione në mënyrë që të mos kemi probleme”, ka thënë Arifi.

Kurse përfaqësuesi i Sindikatës së Arsimit, Rrahman Jasharaj tha se nëse nuk miratohet ligji për mësimdhënësit e viteve të 90-a, ai paralajmëroi se do të futen në grevë. “Ligji nëse vazhdon kështu, mësimdhënësit e Kosovës do shkojnë në grevë”, tha Jasharaj. Amendamenti i Ligjit të Punës, Ligjit të KES-it, Ligjit mbi Grevat dhe Ligjit mbi Organizimin Sindikal, janë disa nga kërkesat e BSPK-së, për të cilat kërkojnë zgjidhje të menjëhershme, në të kundërtën thanë se do të marrin veprime sindikale.