Bahtiri: Nëse rikandidoj në Mitrovicë, fitoj me 63 për qind të votave

23:52 | 11 Dhjetor 2016
Trina Galanxhi

Kryetari i komunës së Mitrovicës, njëherësh zyrtar i lartë i Aleancës Kosova e Re, Agim Bahtiri, është i mendimit që Kosova të shkojë sa më parë në zgjedhje të reja.

Ai ka thënë se sa më shumë të shtyhen zgjedhjet e parakohshme, më keq do të jetë për Kosovën.

Bahtiri ka theksuar se kjo qeveri është duke e çuar shtetin në humnerë.

Sipas tij, qeveria aktuale duhet të shkojë në shtëpi dhe të rifillojnë bisedimet për kohën e mbajtjes së zgjedhjeve.

“Tani është koha të pyetet populli se kë e përkrah. Mendoj se zgjedhjet në Drenas kanë dhënë një sinjal pozitiv të demokracisë dhe të ndryshimit të kësaj qeveria”, ka thënë ai për “Epoka e re”.

Bahtiri është shprehur i bindur në suksesin e kësaj partie në zgjedhjet e ardhshme parlamentare.

Ai ka thënë se asnjëherë më parë AKR’ja nuk ka pasur përkrahje më të madhe te qytetarët.

“Nëse vendoset të jem sërish kandidat për kryetar të Mitrovicës, jam i bindur se këto zgjedhje do t’i fitoj me rreth 63 për qind të votave”, ka thënë Bahtiri.