Është anuluar seanca e shqyrtimit gjyqësor në çështjen penale të njohur si rasti “Banjska” në të cilën akuzohen tre serbët Blagoje Spasojeviq, Dushan Maksimoviq dhe Vladimir Toliq.

Seanca është anuluar sipas njoftimit të gjykatës për shkak të mungesës së kushteve teknike për lidhje me video-konferencë  nga  Gjykata e Shkupit për dëgjimin e dëshmitarit që ishte paraparë të dëgjohej gjatë kësaj seance, raporton Arbresh.info.

“Gjykata Themelore në Prishtinë – Departamenti Special njofton se është anuluar seanca e shqyrtimit gjyqësor në çështjen penale ndaj të akuzuarve B.S, D.M. dhe V.T., pasi përmes emailit zyrtar nga Ministria e Drejtësisë së Republikës së Kosovës është njoftuar se autoritetet e Maqedonisë së Veriut, gjegjësisht Gjykata e Shkupit, ka njoftuar se nuk kanë mundësi që të bëjnë lidhjen me video-konferencë për datën 27 tetor 2025, pasi pajisjet nuk janë funksionale për dëgjimin e dëshmitarit të paraparë”, thuhet në njoftimin e Gjykatës.

Tutje, Gjykata ka bërë të ditur se për caktimin e datave të reja në këtë çështje penale, palët do të njoftohen paraprakisht përmes ftesave zyrtare./Arbresh.info/