Antidroga e Policisë së Kosovës, gjatë ditëve të fundit ka gjetur dhe konfiskuar mbi 1 mijë kg drogë të llojit mariuhanë ku edhe ka arrestuar disa të dyshuar për posedim dhe shitje të paautorizuar të lëndës narkotike. Të mërkurën e 26 prillit u kapën 312 kilogramë dhe një javë më vonë u konfiskuan 800 kilogramë të tjera.

Policia e Kosovës këtë e cilëson si një të arritur të madhe në luftë kundër drogës e cila është e sanksionuar edhe me Kodin Penal të Kosovës, transmeton Indeksonline.

Zyrtarët policor thonë se mariuhana është më shumë e përhapur në tregun vendor ndërsa drogat më të rrezikshme siç janë heroina e kokaina kanë shënuar rënie sa i përket konfiskimit.

Të dhënat e policisë tregojnë se në katër mujorin e parë të këtij viti, policia me njësitet e saj përkatëse ka arritur të gjejë dhe të konfiskoj vetëm 172.7 gramë kokainë në gjithë territorin e vendit ndërsa ka konfiskuar edhe 28 kilogramë heroinë.