Ministrja në detyrë e Drejtësisë, Albulena Haxhiu ka reaguar pas ngritjes së aktakuzës ndaj ministres në detyrë Rozeta Hajdari, lidhur me rastin e rezervave shtetërore.

Haxhiu përmes një postimi në Facebook, i ka dal në mbrojtje Hajdarit duke thënë se hetimet ndaj saj janë të ndikuara dhe sipas saj, kjo është vërtetuar me ngritjen e aktakuzës, transmeton Arbresh.info.

“Kaherë kemi theksuar se hetimet ndaj Ministres Hajdari janë të ndikuara, dhe ngritja e aktakuzës ndaj saj e vërteton këtë. Ministrja Hajdari as nuk është e korruptuar, as nuk ka keqpërdorur ndonjëherë detyrën e saj zyrtare. Për këtë rast jam e njoftuar në çdo detaj, pasi edhe Avokatura Shtetërore ka qenë e përfshirë me qëllim të mbrojtjes së interesit publik”, ka shkruar Haxhiu.

LEXO EDHE:

Afro 3 milionë euro dëm buxhetit të shtetit, Prokuroria Speciale jep detaje për aktakuzën ndaj Hajdarit dhe tre të tjerëve

Ndër të tjera, ministrja në detyrë theksoi se kjo aktakuzë është e motivuar politikisht, pa asnjë bazë reale dhe dukshëm e qëllimshme.

“Ministrja ka bërë gjithçka që ka qenë në dorën e saj për të mbrojtur interesin e vendit dhe për të siguruar që Kosova të ketë rezerva shtetërore, ndryshe nga qeveritë e kaluara, të cilat kishin lënë vendin pa rezerva. Është e qartë se ekziston një tendencë për të njollosur figurën e saj. Drejtësia duhet të mbështetet në fakte dhe në punën e bërë, e jo në ndikime apo qëllime politike”, tha në fund Haxhiu./Arbresh.info

LEXO EDHE:

Skandali me rezervat shtetërore, Prokuroria Speciale ngre aktakuzë ndaj ministres Rozeta Hajdari