Pas ndarjes me gruan, Liridon Salihu akuzohet nga Gjykata Themelore në Prishtinë se ka tentuar ta privojë nga jeta vëllanë e ish-gruas, duke shtënë tri herë në drejtim të Islam Sahitit.

Shkak i tentimit për privimin nga jeta të vëllait të ish-gruas, ishte ndarja nga vetë gruaja, me të cilën i akuzuari Liridon Salihu ka edhe një fëmijë të vogël.

Në aktakuzë thuhet se ndarja në mes çiftit kishte ardhur si pasojë e dhunës së padurueshme të të akuzuarit Liridon Salihu ndaj gruas së tij.

Ngjarja pretendohet të ketë ndodhur më 21 gusht të vitit 2014, në orën 22:18 në Lagjen “Dardania”, përkatësisht në lokalin “Ora Caffe”, ku i akuzuari Liridon Salihu shkoi për të shikuar nëse Islam Sahiti ndodhej në vendin e punës.

Sahiti punonte në kuzhinën e këtij lokali.

Sipas aktakuzës, kur i akuzuari Liridon Salihu e pa se Islam Sahiti ndodhej në kuzhinën e “Ora Caffe”, u largua për pak çaste, duke u kthyer prapë.

Me dorën e djathtë e ka nxjerrë nga xhepi pistoletën dhe ka shtënë në drejtim të të dëmtuarit Sahiti, i cili në atë kohë ishte duke e përgatitur ushqimin, tregohet në aktakuzë.

Në aktakuzë thuhet se predha e njërit nga plumbat arriti ta qëllojë kuletën e të dëmtuarit, duke u ndalur brenda saj.

I dëmtuari pësoi gërvishtje dhe ndrydhje të indeve të buta në regjionin e majtë të legenit, e të cilat janë cilësuar si lëndime të lehta trupore.

Gjithnjë sipas aktakuzës, Salihu akuzohet për veprën penale vrasje e rëndë në tentativë dhe mbajtje në pronësi, kontroll, ose posedim të paautorizuar të armëve.

Në fjalën përfundimtare, Sevdali Zejnullahu, avokati i të akuzuarit, theksoi se qëllimi i Salihut nuk ishte privimi nga jeta i Islam Sahitit.

Avokati deklaroi se i mbrojturi i tij nuk qëlloi drejt të dëmtuarit.

“Arsyeja e vetme e shtënies me armë në drejtim të tokës ka qenë një tërheqje e vërejtjes që të parandalohen provokimet dhe kërcënimet ndaj tij”, tha Zenjullahu.

Më tutje Zejnullahu shtoi se në incizimet e marra nga Banka Tregtare Kombëtare, vërehet se Liridon Salihu qëlloi me armë vetëm atëherë kur u sigurua se nuk gjendej askush [në afërsi].

Shpallja e aktgjykimit do të bëhet më 30 mars. /Kallxo.com